Rekneskap – kva bør du vite før oppstart

Alle som driv eiga bedrift, må føre rekneskap. Det beste er å starte frå dag ein. Du kan sjølv føre din eigen rekneskap, men har du ikke kjennskap til regelverket er det ein fordel å søkje råd hos ein rekneskapsførar.


Må du føre rekneskap?

Dei aller fleste har plikt til å føre rekneskap etter bokføringsreglane (bokføringsplikt). Svært forenkla betyr dette at du må dokumentere alle kjøp og sal og føre dette inn i eit rekneskapssystem. Rekneskapen vert bruka som grunnlag når du skal levere skattemelding (sjølvmeldinga) og næringsoppgåva, skattemelding mva og eventuelt andre lovpålagde oppgåver.

I tillegg til å føre rekneskap etter bokføringsreglane, har for eksempel alle aksjeselskap også rekneskapsplikt.  Dei må i tillegg til å sende inn skattemeldinga, også sende inn årsrekneskapen til Rekneskapsregisteret.

Brønnøysundregistrene om regnskapsplikt

Kven treng ikkje å føre ein rekneskap?

Driv du eit lite enkeltpersonføretak, som ikkje er mva-registrert, og har ei omsetning under 50 000,- kroner, er du vanlegvis unntatt frå bokføringsplikta. Du må likevel kunne dokumentere alle inntekter og kostnader, og ta vare på denne dokumentasjonen på ein oversiktleg måte.

Må du ha rekneskapsførar?

Dersom du har interesse, lyst og kunnskap, kan du vurdere å føre rekneskapen sjølv. I det minste i ein startfase. Det kan uansett vere lurt å få hjelp hos ein rekneskapskyndig med å leggje opp gode rutinar. Det store skiljet kjem den dagen du får tilsette. Då skal det utbetalast lønn, og du får eit stort regelverk å ta stilling til. Mange vel då å setje ut rekneskapen til ein rekneskapsførar.

Val av rekneskapssystem

Det finst mange gode rekneskapsprogram på marknaden. Spør andre kva dei brukar og er nøgde med. Sjekk ulike leverandørar før du vel. Vel gjerne eit rekneskapssystem som er kompatibelt med levering via Altinn.

Eigen bankkonto

Ikkje bland privatøkonomien og økonomien til bedrifta. Opprett ein eigen bankkonto som du brukar berre til bedrifta.  

Korleis skal kunden betale?

Det vert stilt ulike krav til dokumentasjonen om du skal selje kontant eller om du skal sende faktura til kunden. Det er derfor viktig å avklare tidleg kva behovet ditt er slik at du er klar til å sende faktura eller ta imot kontant betaling så snart du startar opp.

Kontantsal (Direkte oppgjer)

Sel du kontant må du ha eit kassasystem som tilfredsstiller krava i bokføringsreglane. Frå 1. januar 2019 må alle brukarar av kassasystem nytte eit produkterklært kassasystem det må liggje føre ei erklæring frå leverandøren som stadfestar at kassasystemet tilfredsstiller krava i kassasystemlova og -forskrifta. Kontantsal er definert som sal der kjøparen betalar for vara eller tenesta når ho vert motteken. Dette gjeld både når betalinga skjer i form av kontantar, bankkort eller ulike betalingsløysingar på mobil (for eksempel Vipps). 

Faktura

Det er klare krav til kva som krevst av informasjon på ein faktura i bokføringsforskrifta. Det er blant anna krav om at ein faktura skal ha eit fakturanummer som vert tildelt automatisk i eit dataprogram. Alternativt må du få trykt opp blankettar på eit trykkeri, der fakturablankettane inneheld fortløpande fakturanummer og det fulle namnet til føretaket, adresse og organisasjonsnummer.

Ikkje berre ei plikt

Skal I tillegg til at du er pliktig til å føre rekneskap, er ein god gjennomarbeidd rekneskap den beste styringsreiskapen du har. Med god oversikt vil du mykje tidlegare kunne korrigere kursen dersom det er nødvendig.

Skal du søkje om offentleg støtte, eller eit lån i banken, vil rekneskapen din vise verdifull informasjon om bedrifta.

Bruk tid i starten på å setje deg inn i kva for reglar som gjeld for deg.

Vil du vite meir?

Skatteetaten arrangerer kurs tilpassa dei som nett har starta verksemd. Kursa vert arrangerte over heile landet og er gratis.

Skatteetatens kurs for nye næringsdrivende

 

Fant du det du leitte etter?

Takk for tilbakemeldinga.

Åpne kontaktskjema